Aurkezpena

1997an Emun sortu genuenetik, Euskal Herriko gizartearen garapenaren alde lan egin dugu, euskararen egoera normalizatzeko misioa gure eginez. Hamarkada bi geroago, gizarteak gaur egun dituen beharrei erantzuteko esperientzia eta lanabesak ditugun jakitun, garai berri bati gogotsu ekin diogu, beharrezkoak diren portaera aldaketetan eragiteko.

Gure apustua gaurkotuz, indarberrituta lan egin nahi dugu. Arazo sozialen aurrean gaur egungoak baino eraginkorragoak, iraunkorragoak eta bidezkoagoak diren eta gizarte osoarentzako balioa sortzen duten irtenbide berriak eman nahi ditugu.

Esku artean duzun katalogo honetan honako arlo hauetako produktu eta zerbitzuak eskaintzen dizkizugu: hizkuntza, kultura, aniztasuna eta parte hartzea.

Gure sorreratik izan den bezala, gure jardunaren oinarrian dago Emun kooperatibak duen xedea: euskararen eta Euskal Herriaren garapena. Baita bere balioak ere, euskararekiko eta bezeroarekiko konpromisotik eta inplikaziotik hasita.

Jakitun gara datozen urteotan ere gakoak ¡zango ditugula berrikuntza eta lankidetza. Emun osatzen dugun pertsona talde anitz, profesional eta dinamikoak erronka berriei ilusioz eta sormenez aurre egiteko erakusten duen grinari esker, gizarteak hainbat behar asetzeko ezinbesteko bidelaguntzat hartuko gaituela uste dugu.

Guk konpromisoa dugu zerbitzuak osatzen eta sendotzen joateko. Zu ere gure alboan nahi zaitugu.