EMUN LANA EUSKALDUNTZEKO KOOPERATIBA

Bartzelonako Unibertsitateak Xavier Vilaren zuzendaritzapean eskaintzen duen masterrean ponentzia bat eskaini du EMUNek.

Assessorament Lingüístic, Gestió del Multilingüisme i Serveis Editorials (ALGMSE), masterraren barruan,  Hizkuntza Politika eta Eleaniztasunaren Kudeaketari buruzko gradu-ondokoa dago. Besteak beste, gradu-ondokoaren helburua da erakunde pribatu eta publikoetan eleaniztasuna kudeatzeko errekurtsoak zeintzuk diren ezagutzea. Enpresa kudeaketako erremintak nola aplikatu irakasten die Imanol Larreak ikasleei eta irakasgai hori osatzeko, EMUNetik Enrike Letona izan zen, Euskal Herrian daukagun esperientzia bertako ikasleei azaltzen. Oso modu positiboan baloratu zuten bertako ikasleek irakasgaia, edukiak erabilgarriak eta aplikagarriak iruditu zitzaizkielako.

Martxoaren 21ean, osteguna, Arrasateko erdialdean eta goizeko 5:40an, 1.622. kilometroan hartu du lekukoa EMUNek eta zirraragarria izan da.

Zirraragarria izan da goizaldeko ordu horietan jendetza eta  berotasuna apartekoak izan direlako. Garbi gelditu da, beste behin ere, ordutegi eta eguraldi kontuek ez dutela KORRIKAren arrakasta baldintzatzen.

Orain, egunerokotasunean, dugu erronka. Herritarrok, era guztietako entitateok eta baita euskalgintzan ari garenok ere, sasi guztien gainetik eta elkarlanean,  KORRIKAk sortu dizkigun zirrara eta hauspoari segida eman behar diogu. Egunerokotasunean euskaraz bizitzea dugu helburu eta horretarako KORRIKAren uholdea bazter guztietara barreiatu behar dugu, ttipi-ttapa, ttipi-ttapa, inertziei aurre eginez, euskararen normalizazioan urrats praktikoak eginez.

Orain, beraz, egunerokotasunean, eman euskara elkarri!

Iazko bideari jarraituz, aurten ere, Gipuzkoako Foru Aldundiak  herritarren partaidetza sustatzeko diru laguntzen deialdia egin du. 2013-2014 urteetan burutuko diren egitasmoak lagunduko dira.

Udal bakoitzak gehienez 2 eskaera aurkeztu ahal ditu: lehentasunezkoa eta bigarren mailako proiektua, bereizketa hori eginez. Udal taldeek eskaera bakarra aurkeztu ahal dute.

Eskaerak GFA egoitza atarian aurkeztu behar dira eta epea martxoaren 22an amaitzen da.

Gehienezko diru laguntzak honakoak izango dira:

Diruz lagundu ahal izango dira:

Gipuzkoarren parte-hartzearekin lotutako proiektu edo prozesu bat abiatu nahi baduzu eta horretarako EMUNen laguntza nahi baduzu, jarri gurekin harremanetan.

Emunek antolatuta, otsailean zehar hainbat bisitaldi egin ditugu gure bezeroekin
Donostiako San Telmo Museoak antolatutako BADU BADA erakusketara. Ainhoa Lasak  gidatu ditu bisitak TELPetan oinarrituta.

Bisita horiek amaiera polita eman diote azaroan hasita erakusketan egin den lanari. Izan ere, ordutik makinatxo bat bisitaldi eta familientzako tailer antolatu ditu Emunek.

Enpresa zein administrazioetan egiten dugun lanarekin harreman zuzena du erakusketan ikusitakoak. Hori izan da bezeroak gonbidatzeko arrazoi nagusia. Bezeroekin beste era bateko gune eta esperientziak konpartitzea oso polita izan da denontzat. Are gehiago Ainhoak erakusketari atera dion zukuagatik, eman dizkigun erantzunengatik eta gugan sortu diren galdera berriek bisitaldia aberastu dutelako.

Bezero baten hitzetan:   erakusketa interesgarria izan da euskara munduan kokatzen lagundu digulako. Ditugun pertzepzioez ohartarazi digu eta hausnarketarako parada eman digu.

Erakusketaren laburpena argazkitan.

Tolosako Udalak, Banaiz Bagara elkarteak, Tolosaldea GLHBI-ko Ikasmina: herriz herrik eta EMUNek elkarlanean euskara ikastaroak antolatu dituzte, adinekoen zaintzan lan egiten duten etorkinentzat. Hori aurkezteko prentsaurrekoa egin zuten atzo Tolosan.

Adineko pertsonen zaintzan, asetu beharreko lehendabiziko premia bezala, ondorengoak etortzen zaizkigu burura: laguntza fisikoarena, elikadurarena edota garbitasunarena. Baina hauez gain, hizkuntzarena, komunikatzerarena, mendeko egoera batean, elkar ulertzea baino gehiago da. Neurri handi batean, emozioak, konfiantza, lasaitasuna, norbere burua kokatzea … hizkuntzarekin lotuta daude. Laguntza edo zaintza behar duen adineko pertsona batentzat asko suposatzen du bere ohiko hizkuntza ezin erabili izateak.

Horregatik, arazo hauei aurre egiteko asmoz, Tolosaldea GLHBI-ko Ikasmina: herriz herri proiektuaren baitan, otsailaren 25atik aurrera bereziki adineko pertsonen zaintzaileei zuzendutako oinarrizko euskara ikastaro bat antolatu da. Sektoreko langileak eta sektore horretan lana bilatzen ari diren pertsonek hartu ahal izango dute parte. Baita adineko pertsona euskaldunek ere, zaintzaileekin praktikatuz euskarazko oinarrizko komunikazioa lantzen ikasi dezaten. Ekimenak Tolosako udalaren babesa eta diru-laguntza du.

Ikastaroan pertsonen zaintzan beharrezkoak diren elkarrizketa errazak irakatsiko dira baina baita hizkuntza berriekiko sentitzen den deserosotasuna gainditzen ere. Era berean, intuizioa erabiliz ulertzen, egoeraren arabera hitz egiteko modua egokitzen… erakutsiko diete parte-hartzaileei. Dena praktikan eta ahozko komunikazioan oinarrituta.

Saioen gidariak EMUN eta Banaiz Bagara elkarteko ordezkariak izango dira.

Ikastaroa 14 saiotan banatuta egongo da, eta otsailaren 25ean hasiko da, astean bi aldiz eta goizez.

Ikastaroa dohainik da, baina plaza kopurua mugatua egongo da eta asistentzia eskatuko da.

Izen-emate epea zabalik dago jada, eta horretarako interesatuek honako telefono zenbakietara deitu dezakete:

TOLOSALDEA GLHBI:  943 651 147  ikasekin@tolosaldea.com

BANAIZ BAGARA elkartea  943 331 455 / 645 733 818 ninaizgugara@gmail.com

Ikastaroa hasi aurretik, mahai ingurua

Ekimen honekin lotuta, datorren hilean, otsailaren 19an mahai ingurua egingo da Tolosako Kultur Etxean. Gaia honakoa izango da: Hizkuntzaren garrantzia adineko pertsonen zaintzan. Ekitaldia 19:30ean hasiko da eta honako hauek izango dira hizlariak: Xabier Mendiguren Bereziartu; Garbiñe Petriati (Hizkuntza Eskubideen Behatokia); Tolosako Udaleko Gizarte Zerbitzuetako ordezkaria eta adineko pertsonen zaintzan esperientzia duen Matia Fundazioko ordezkaria.

Bizkaiko Foru Aldundiak, Bizkaiko erakundeek euskararen erabilera enpresaren munduan sustatzeko planak diruz laguntzeko eskaera egiteko epea zabaldu du.

Sozietatearen egoitza Bizkaiko Lurralde Historikoan duten merkataritza sozietateak, kooperatiba sozietateak, banakako enpresaburuak eta profesionalak izan daitezke foru dekretu honetan araututako diru-laguntzen onuradun.

EMUN prest daukazu diru laguntzak kudeatzeko eta plana garatzeko lanetan laguntzeko. Gaiaren inguruko interesik baduzu ez izan zalantzarik eta jarri zaitez gurekin harremanetan.

EMUNetik Gabon zoriontsuak pasa ditzazuen opa nahi dizuegu

Info 7 Irratia, EMUNekin batera, GUREAZ BLAI irratsaioa ekoizten hasi zen aurten.

Euskaldunak aktibatzeko irratsaio honek bere bidea darrai eta hurrengo asteartekoa 10. saioa izango da. Zorionak guztioi!

Bi hizkuntza jakinda, edukazio txarrekoa da euskaraz hitz egitea ulertzen ez duen jendea badago. Ados al zaude baieztapen horrekin entzule? EMUNeko Ainhoa Lasak eta Info 7ko Nekane Zinkunegik horixe hartu dute aste honetako saioko abiapuntu modura. Egin kontu atalean, berriz, Gipuzkoako Foru Aldundiko Euskara Zuzendari Zigor Etxeburua elkarrizketatu dute, Ika-Mizka ekimenaz hitz egiteko.

Gipuzkoako Foru Aldundiak diruz lagundutako irratsaioa da eta asteartero, 13:05ean emititzen da.

Orain arte saio guztiak lantalan.com blogean bildu ditugu.

On egin!

EMUNkideok ere euskaraz bizi nahi dugu eta horregatik bat egiten dugu abenduaren 1ean Kontseiluak Donostian antolatu duen manifestazioarekin.

Eman zure atxikimendua www.euskarazbizinahidut.org webgunean.

Atzo Gasteizko Europa Jauregian Bikain ziurtagirien banaketa ofiziala egin zen. Bikain ziurtagiri ofizial eta publikoa da, Eusko Jaurlaritzak eta Euskalit Fundazioak emana, enpresa nahiz erakunde batean euskararen presentzia, erabilera eta kudeaketa egiaztatzen duena.

Blanca Urgell Kultura sailburua, Lurdes Auzmendi Hizkuntza Politikarako sailburuordea eta Nuria Lopez de Gereñu Confebask-eko idazkari nagusia izan ziren banaketa ekitaldian eta guztira 28 erakundeei  banatu zieten ziurtagiria.

Gure bezero diren enpresa hauek jaso zuten ziurtagiria:

• Ziurtagiri beltza: PESA
• Zilarrezko ziurtagiria: FAGOR Etxetresna Elektrikoak (zerbitzu zentralak), Fagor Elektronika, Ikerlan
• Urrezko ziurtagiria: FAGOR Etxetresna Elektrikoak (Hotzaren negozioa)

Zorionak ziurtagiria jaso duzuen guztiei!